政Whats噏：禁售電子煙惹議　邵家輝拉布玩殘陳肇始

政府喺上年提出禁售電子煙、加熱煙同草本煙等另類煙草產品，禁止其入口、製造、售賣、分發同宣傳。不過，政府由最初規管變成一刀切而惹來反彈，今日(20日)草案交畀立法會首讀及二讀時，就有建制派議員出招險釀流會，相信嚇到食物及衞生局局長陳肇始一額汗喇！

拉布已經唔係泛民專利，好似今個立法年度就有飲食界議員張宇人喺立法會工務小組委員會中拉布，更提出中止議程獲通過，該項目到今個月先排番上議程待議。

政府今日將《2019年吸煙(公眾衞生)(修訂)條例草案》提交立法會首讀同二讀，原本官員發言完畢就會中止待續，交畀內務委員會處理，不過向來表明反對條例嘅批發及零售界議員邵家輝就出手，再加上民主派議員區諾軒接力，令到原本平靜嘅程序加添枝節。

陳肇始發言時話另類吸煙產品愈見流行，而被包裝成危害較少嘅替代品更會誘使年輕人同非吸煙者試食，而且同樣危害健康同有二手煙問題。佢更話立法會衞生事務委員會上年通過咗無約束力議案，促請政府全面禁止，而政府要防患於未然，亦要確保多年嘅控煙成果唔會毀於一旦。

邵家輝喺陳肇始發言中途殺出，提出點算法定人數要求，當時陳肇始都未知乜嘢事繼續發言而被叫停，而在席嘅泛民見到邵家輝罕見舉動都傳出笑聲，似乎樂見有建制派拉布喇！而當時係下午兩點左右，唔少議員午膳仍未返到立法會，點算人數期間只有零星議員返回座位，的確有流會危機，最終去到13分57秒、距離流會只剩1分鐘多啲，仲要靠主席梁君彥進入會議廳先夠法定人數。

陳肇始捱過流會危機，但又有區諾軒緊接提出規程問題，認為陳肇始只提議會中支持全面禁絕嘅意見，質疑佢忽略咗要求規管、反對禁絕嘅意見，搞到陳肇始都要立即作出澄清，話只係為首讀提供資料，但就講到口窒窒似乎事前未有準備。之後邵家輝又接力，直指當時通過嘅無約束力議案係加強規管，唔係杜絕，批評陳肇始夾硬強加落委員會度。

草案喺議會內面對挑戰，而議會外亦唔易過，事關今日就有示威者到立法會請願，有幾位議員到場接收請願信以示支持，睇嚟今次只係頭炮，陳肇始要做定心理準備，未來要繼續接招喇！