政Whats噏:何啟明爆麥美娟借錢食飯 嚇醒局長

2019年02月20日 15:47
東網電視
更多新聞短片
何啟明大爆黨友麥美娟成日同佢借錢,嚇到一眾政府高官「醒晒」。

政府廣告都有講「借錢梗要還,咪畀錢中介」,有借有還方為上等人。工聯會立法會議員何啟明今日(20日)大爆黨友麥美娟(Alice)成日同佢借錢,仲係用嚟搭車同食飯,嚇到會議廳內一眾本來「瞌緊眼瞓」嘅政府高官「醒晒」,通通轉頭望向何啟明。

今早立法會特首質詢環節,何啟明就趁機問有關港人在內地開戶,提到喺內地冇電子支付就寸步難行,搭唔到車之餘,食飯都落唔到單,而麥正正就係冇戶口,所以每次返內地都要同佢借錢,幸好麥每次都還錢。質詢環節雖得半個鐘,但唔少官員都聽到瞌眼瞓,點知聽到麥要借錢,一班局長齊齊轉身望過去,似乎佢哋都好關心電子支付。

不過,有份推廣電子支付嘅財經事務及庫務局局長劉怡翔就冇望過去,頭耷耷專心喺枱底玩電話,唔通佢諗住眼不見為乾淨,睇唔到就當聽唔到?

事後麥向傳媒喊冤,話自己只係冇內地銀行戶口,電子銀包冇錢先會借錢增值,但就有還錢,佢仲向金融界議員陳振英求救。陳就話自己有兩個內地銀行戶口,分別有數萬港元人民幣,話試過有女議員返內地冇錢,急急叫佢同助理過數,所以叫Alice下次可以搵佢借錢喎。