政Whats噏：稅務例修訂冇人理　梁繼昌斥寫得太深

稅務對唔少人嚟講都會覺得相當複雜，所以好多時都要交畀專業人士處理，而立法會會計界議員梁繼昌(Kenneth)作為專業人士之一，喺立法會有稅務條例要修訂時，好多時都會由佢出任條例草案委員會主席，不過佢今日(20日)就話，過去幾年每次條例草案交到立法會大會審議時都覺得好感慨，事關「每逢呢啲條例個Chamber(會議廳)都係空嘅」，大鬧政府將條例草案寫到太艱深，搞到議員都唔想傾咁話！

Kenneth話，條例草案用字係應該簡單易明為主，令普通市民可以唔使透過律師解釋都睇得明先得，咁先可以彰顯到法治精神，不過政府就做唔到。Kenneth仲投訴好多稅務相關嘅條例過咗就冇下文，投訴政府唔會適時做番啲報告，睇吓有關稅制嘅經濟效率，加上好多時只係單單提供稅務優惠，缺乏其他配套，如人力資源、資金等，咁好難吸引其他外來投資者，導致經濟效率好低咁話。