政Whats噏：張建宗攬楊潤雄　去信泛民解畫

立法會一眾民主派議員早前去信畀政務司司長張建宗打小報告，投訴教育局局長楊潤雄拒交代TSA數據。張建宗今午(20日)就回信畀各民主派議員，幫楊潤雄解畫，希望議員明白當局真係冇相關數據，唔係刻意隱瞞或妨礙立法會監察政府工作，仲話楊會就事件主動搵葉建源及關注議題嘅議員保持密切聯繫，加強溝通喎！

當日葉建源係要求當局交代有幾多間學校申請全級評估同學生數目等資料，而張就話，教育局只需要全港層面數據，參與學校數目多寡唔係政策目標，所以教育局根本冇掌握與政策實施無關嘅分類，希望大家明白當局係真係冇數據，而唔係唔肯畀。

至於楊潤雄回應質詢時叫議員唔好「上綱上線」，張又再幫楊解釋，唔係話議員嘅提問，只係回應被指漠視《基本法》中政府嘅憲制責任。張仲承諾，如果政策局冇相關資料，會盡早同議員溝通兼解釋原因，並嘗試從其他途徑解答議員關注。雖則打小報告好小朋友，但官員成日「開口夾着脷」，係應該要好好檢討吓。