政Whats噏：謝偉銓借車公　鬧政府搞過渡房屋規限多

輪候公屋條隊愈嚟愈長，坊間強烈要求政府搞多啲過渡性房屋畀等緊上公屋嘅基層市民，但進度龜速，立法會建築、測量、都市規劃及園境界謝偉銓(Tony)今日(21日)喺立法會辯論「增加過渡性房屋」議案時，更引用年初二新界鄉議局主席喺車公廟為香港求得第八十六中籤籤文，指香港有好多難以發展嘅土地，填海亦難解劏房戶嘅燃眉之急，批評政府規限太多。

籤文係咁寫嘅：「石田為業喜非常，畫餅將來未見香；怎曉田耕耘不得，那知餅食不充腸。」Tony話唔係鼓吹迷信，只係籤文講得好貼切，正如郊野公園用地、偏遠嘅新界農地、已更改用途嘅棕地等，就係籤文中嘅「石田」一樣，難以耕種，亦難以喺短期內用作大規模、高密度嘅房屋發展；至於土地專責小組嘅建議，就連中短期措施都要至少7年，甚至10年先有得入伙，填海就更加要20年，對劏房戶而言就似「畫餅充飢」，「未見香」又「不充飢」。

Tony又批評政府對改為過渡性房屋嘅審批時間好長，兼且限制多多，但依家最重要係及早提供更多單位出嚟，仲話唔少人經常批評政府生人霸死地，事關見到啲官地雜草叢生唔見有發展，建議嗰啲官地5年冇發展就要交出嚟研究用嚟發展過渡性房屋。

提出議案嘅議員鄭泳舜話近年住喺不適切住房嘅市民增加，政府「好似冇做過嘢」，搞到劏房戶「愈住愈貴、愈住愈細」，要求政府大幅增加過渡性房屋供應，例如將過渡性房屋政策納入《長遠房屋策略》中，兼且成立唔少過20億港元嘅「過渡性房屋基金」。另一議員麥美娟亦大鬧政府曾承諾增加過渡性房屋供應，至今未見實績，又話單靠非政府團體難以得到好多資金同最新嘅技術，政府應擴大過渡性房屋專責小組嘅職能同規模。

泛民議員亦鬧爆政府倚靠非政府組織去提供單位，但往往只係每次得幾百個，滿足唔到現時數以萬計住喺不適切住房嘅市民。

運輸及房屋局局長陳帆重申政府有決心解決問題，又話過渡性房屋係短期措施，隨時間會有所變化，所以唔適合納入《長策》，仲繼續死撐要透過非政府團體去處理。最後鄭泳舜嘅議案獲得通過，睇怕政府都真係要親自落場做返啲嘢先得喇！