政Whats噏：鄭國漢否認為歐陽伯權搵接任人

外界盛傳嶺南大學校董會主席歐陽伯權將接任港鐵主席，但佢本人一直冇回應過呢件事，而嶺大今日(21日)搞傳媒聚會，校長鄭國漢就否認正物色新任校董會主席。

港鐵主席馬時亨任期將喺今年6月30日屆滿，早前已傳將由歐陽伯權接任嘅消息。問到若歐陽伯權有新工作嘅話，係咪會辭任校董會主席嘅職位？鄭國漢否認正物色新任校董會主席，仲話：「唔係佢接受咗另一份工作，我哋就要搵新嘅校董會主席。佢嘅任期仲有一年多至兩年，相信佢會做到任期結束。」

現年66歲嘅歐陽伯權，曾經喺美資保險公司擔任亞洲區總裁，於2017年退休。佢喺2014年10月時獲委任為嶺大校董會主席，翌年10月該校因校董會爭議，會議更被學生圍堵。