政Whats噏︰再有下屬劈炮　鄭若驊眾叛親離

律政司司長鄭若驊「唔告黎智英，放生梁振英」遭全城鬧爆，佢領導下嘅律政司內部亦立立亂，接連有人「劈炮」。繼律政司刑事檢控科副刑事檢控專員許紹鼎早前請辭後，有指擔任鄭嘅政務助理約半年嘅陳可恩，本周初亦已離職，並將加入保良局出任副行政總監。鄭上任律政司司長僅一年多啲，律政司已有多人離任唔撈，莫非鄭呢位上司真係咁難頂，以致眾叛親離？

鄭若驊去年1月初上任，曾為袁國強及鄭兩任律政司「大內總管」嘅律政司司長前政務助理李文成，就於鄭上任唔夠半年離任。陳可恩同年8月接替李嘅職務，該職位屬D2級官員，月薪達17萬港元，惟陳出任有關職位僅半年就已離職。

據了解，陳將出任保良局副行政總監，該職位經過公開招聘，主要負責協助行政總裁的工作，以確保日常運作暢順。

鄭甫上任就捲入寓所僭建醜聞，難免影響律政司內部士氣，對於違法佔領行動等多宗案件又「應告唔告」，去年12月律政司更因為決定唔檢控前特首梁振英UGL案，且冇徵詢外間獨立法律意見而捱轟。鄭上任後律政司飽受衝擊立立亂，真係唔怪得人辭職喇！