政Whats噏：立會擬訪長三角　議員要求多樣樣要加

立法會議員不時都會外訪，睇吓唔同地方嘅發展情況，等香港可以借鑑，好似經濟發展事務委員會、工商事務委員會、財經事務委員會、資訊科技及廣播事務委員會嚟緊就打算去長江三角洲地區主要城市訪問，初步行程係喺4月21至24日考察上海同杭州，預算每人需要14,775港元，今日(22日)就舉行聯席會議商議行程細節，點知各議員都要求多多，好多行程都話要加落去咁話！

其實唔同議員關注唔同議題都好平常，難得有機會外訪當然想加入多啲相關行程，好似金融服務界議員張華峰(肥老闆)覺得參觀證券交易所得45分鐘唔足夠，想延長至1小時；漁農界議員何俊賢就建議睇陽澄湖大閘蟹，睇吓條生產線同食品安全問題，其他議員都各有訴求，不過行程就得4日，似乎好難安排喎。

另一議員黃碧雲見狀，就建議不如中間有啲行程分開行動，例如唔想睇證券交易所嘅議員，就喺同一個時段去睇大閘蟹，點知其他議員一聽到，隨即就話：「提議睇證券交易所嗰個先最想睇大閘蟹喎！」暗指肥老闆為食，搞到會議室內嘅議員都捧腹大笑，如果最後行程真係咁安排，唔知肥老闆又會點揀呢？

至於泛民會唔會參加，據知民主黨、公民黨、專業議政都會派人去，每個板塊2至3人，合共約6至8人，換言之，泛民四大板塊中只有議會陣線唔打算去。