政Whats噏：考海關穿梯易肥佬　鄧以海教路公園操

近年年輕人想搵份穩定優差愈嚟愈難，講究體能嘅紀律部隊都成為搶手工種，應徵人數屢創新高，不過又唔代表年輕人體能「Fit」過上一代。海關關長鄧以海話，年輕人體能兩極化，教路考海關前去公園操喎。

鄧發現，好動嘅後生一輩體能非常好，但亦有啲只掛住打機而令到體能好差，而海關嘅體能測試當中，以穿梯測試最多人唔合格，佢就話呢個測試要訓練考生靈敏性，紀律部隊中亦只有海關要考，但其實公園同郊野公園都有啱用嘅訓練設施，各位有意投考海關嘅人士要留意喇。

至於入境處處長曾國衞就話自己年輕時冇乜娛樂，所以只會通山跑，亦因此當年毋須為體能測試做特訓，仲話有信心現時接受一般體能測試都可以過關添，果然夠晒「Fit」。佢認為，制服對年輕人有種吸引力，形象比較正義，覺得投考人數多與市道關係唔大。