政Whats噏：卿姐力數議員罪狀　遲到又唔睇文件

守時係一種美德，不過今時今日好多香港人都有遲到嘅習慣，連議員都唔例外！素來守時嘅前立法會議員、前民主黨(白鴿黨)主席劉慧卿(卿姐)，今日(23日)出席該黨活動時，就大鬧議員成日遲到，當中唔止係白鴿黨，不論係咩立場嘅政黨都有呢個情況，仲話佢以前開會時，一夠鐘就一定會催主席開會，依家成日都要等齊人，咁對守時嘅人嚟講太唔公道。

卿姐再數議員另一項罪狀，就係唔睇文件，準備不足，開會時又只係講自己想講嘅嘢，講完就走，完全唔聽其他人講，亦冇做好有關議題嘅跟進。佢斥呢啲係「政客」所為，叮囑後輩千祈唔好咁做。

其實唔單止議員，卿姐對該黨嘅社區主任都有不滿嘅地方，例如佢哋畀人喺網上鬧幾句就「震過貓王」，縮埋唔見影，卿姐強調從政要有火，自言自己雖然冇做議員，但仲係「老虎都打死3隻」，話覺得自己冇錯就一定要出嚟講。雖然佢冇點名講邊個，但相信一眾後輩都心知肚明，睇嚟班細嘅唔反省吓都唔得喇！