政Whats噏：元朗天橋疑偷步招標　陳帆博懵議員圍剿

立法會多黨派炮聲隆隆，要求造價高達17億元嘅元朗天價天橋「減磅」，運輸及房屋局及路政署早前抽起元朗天價天橋項目，謀定而後動。路政署近期終有動作，就元朗天價天橋刊憲招標，擬於今年7月動工，但此舉引來新一波爭議，遭到民主派議員狠批「偷步招標」，甚至係製造既定事實逼議員硬食「開標」造價，其中立法會議員鄺俊宇揚言唔會輕易「放行」，計劃喺立法會財務委員會審議撥款時不斷追問運房局局長陳帆，目標係「問到佢(陳帆)乾，反轉再反轉」咁話！

全長540米嘅元朗天價天橋惹來議會同地區反彈，底因係每米造價燒錢316萬元，不但民主派鬧爆造價驚人，連向來支持政府嘅建制派都有微言，覺得好難硬啃呢個造價，經過同當局討價還價後，路政署終於刊憲招標，外界一般相信，此舉係希望投標者提出更具成本效益嘅建造同創新建議，去回應議員訴求。

不過，今次元朗天價天橋造價問題嘅死結未解，就掀起新一個問題，就係財委會未審批撥款嘅情況下，政府就刊憲招標，引發「偷步招標」嘅疑慮。

一直跟進元朗天價天橋問題嘅立法會議員朱凱廸，於社交網站繼續窮追猛打。佢認為今次事件涉及三大問題，第一，元朗天橋重新闖關，政府係咪有出爾反爾之嫌；第二，元朗天橋爭議既涉及造價問題，亦涉及元朗市中心嘅環境及景觀問題；第三，從立法會審議角度出發，佢質疑運房局今次係變本加厲，唔單止「偷步招標」，而且仲要「偷步開標」，選定承建商先問財委會攞錢，變相係逼議員接受，否則「蘇州過後冇艇搭」。佢事先張揚，唔會畀政府快刀斬亂麻，未來幾個月會聯合元朗居民提出改善方案，應對元朗行人擠逼問題。

身兼元朗區議員嘅鄺俊宇亦話，元朗天橋造價高達17億元，大家都覺得好貴，政府依家2月就招標，希望7月動工，但事實擺在眼前，就係一日唔喺財委會申請到撥款，一日都開唔到工，唔明白政府點解覺得7月一定開到工。

鄺其後提及，自己多次提及元朗天橋造價問題，質疑係咪議員「嘈一嘈就會平一啲，唔嘈就唔平」，又表明立法會係咪批錢都要睇政府到時有咩功課交，係咪解釋到，揚言會不斷追問陳帆到底︰「問到佢乾，反轉再反轉」。

話時話，元朗天價天橋嘅爭議政治味道甚濃，陳帆若然以為提早招標，造價稍為下跌就可以令議員「收貨」，咁就真係太天真太傻。講到底，陳帆都係要做足政治游說工作，咪以為可以於短時間內博大霧通過到喇！