政Whats噏：學做心肺復甦　梁君彥跟唔上慢幾拍

議員經常响議事堂中激辯至青筋暴現，心臟隨時會不勝負荷，立法會今早(25日)就有個簡介會，由消防處代表向議員講解心肺復甦同心臟除顫器嘅使用方法。立法會主席梁君彥就話，立法會工作係高危，有必要認識多啲急救知識，有需要嘅時候都可以救人一命。建制派嘅盧偉國都好認同梁君彥嘅講法，話議員經常响議事堂「互片」，實在係高危一族。

不過當一眾議員對住個公仔學習心肺復甦法，人家話先舉左手後舉右手，梁君彥就跟唔上口訣，動作慢咗幾拍之餘，雙手都無依指示做好，就直接跳去直手按壓嘅步驟，看來梁君彥要搵機會惡補一下心肺復甦法嘅技巧喇。

至於立法會議員劉國勳，初時就未能掌握心肺復甦法嘅按壓速度，密密按壓以為就可配合「一秒撳兩下」嘅速度，直到後來有人提醒，先至知道自己撳得太快。議員柯創盛以前參加過民安隊，曾學習心肺復甦法，今次簡介會算係溫故知新。佢話議員持唔同政見，一旦言語衝突激到心臟病發的話，急救嘅技巧就好有用。

另一議員麥美娟出席今次簡介會，令佢憶起10年前一位親友做健身運動時心臟病發，佢收到消息後立刻放下抗議活動，趕去醫院亦未能見其最後一面，所以佢主張公眾設施要多啲添置心臟除顫器之外，亦需向大眾推廣心肺復甦法。

至於立法會大樓目前有9部心臟除顫器，今早簡介會參與者眾，除咗立法會議員同助理，加埋秘書處超過100人參加。