政Whats噏:鄭若驊表現不濟 市民促扣薪懲處

2019年02月26日 17:38
東網電視
更多新聞短片
鄭若驊畀市民點名要求扣薪。(陳嘉順攝)

市民對政府措施或政策不滿,可以向立法會公共申訴辦事處提出申訴,交畀立法會議員處理。民望長期創新低、評分屢墊司底嘅律政司司長鄭若驊就畀市民點名,要求扣減其薪酬作懲處。

有市民喺上星期致電立法會秘書處公共申訴辦事處提出申訴,斥責唔少現任政治委任官員,好似鄭若驊同埋運輸及房屋局局長陳帆表現不濟,令市民失望。該名市民認為呢啲官員要自行檢討之餘,亦需要扣減薪酬以示懲處。

市民有咁嘅意見並不出奇,事關鄭若驊民望長期包尾,自上任起已經醜聞纏身,檢控又予人「應告唔告」、偏私觀感,好似多次放生壹傳媒黎智英,自然會惹起市民不滿喇。至於陳帆主理嘅基建項目甩甩漏漏,亦難怪被要求減薪。

不過立法會議員都唔好得好多,事關又有市民作出申訴,特別針對非建制派立法會議員,批評佢哋無妥善履行議員職務,好似齋批評政府施政又無建設性建議、擾亂會議秩序等,但竟然每月獲高額酬金,認為呢班議員都要深切反省囉。