政Whats噏：資訊系統舊到爆　立法會揼千萬搞網站

政府大力搞創科，打造成智慧城市，但公共服務資訊科技系統通通落後過人，介面複雜兼難睇，完全唔吸引。就以立法會網站為例，雖則有唔少對香港影響深遠嘅法案同文件，但普通市民根本唔識搵，可謂見到寶都唔識執。有見及此，立法會擬斥資近千萬港元重新開發網站，仲請多個專人負責處理，有議員大呻：「早就應該搞喇！」

立法會喺2018/19年度嘅預算開支為8.9億港元，而根據新一份預算案，2019/20年度嘅開支預算進一步增至9.5億港元，足足增加6000萬港元。睇真啲，原來立法會打算嚟個軟硬件大翻新，包括使981萬港元重新開發立法會網站及提供新網上資訊服務、花480萬港元提升Wi-Fi系統、花320萬港元重新開發現有嘅數碼謄錄系統，同埋花140萬港元採購最新嘅辦公室軟件，加加埋埋要花約1900多萬港元。

立法會嘅IT系統真係咁不堪？行政管理委員會委員、資訊科技界議員莫乃光就大嘆「早就應該搞喇」，立法會真係有太多嘢要Update(更新)，自己熟悉立法會運作，喺網站搵文件就容易，但普通市民想搵嘢真係難過登天，查實政府啲網站都一樣。佢又話外國議會網頁介面易睇，容易搵到新資訊，比較方便使用者，所以使1000萬港元唔算多喇，啲嘢太舊係要花啲錢。

此外，立法會仲會使975萬港元提升電視廣播系統，花幾十萬元換無線通訊裝置等，真係樣樣都係錢。另外，繼去年立法會主席梁君彥豪使90萬港元更換座駕「LC 1」，今年就輪到秘書長陳維安嘅座駕「LC 2」有得換，但今次就平得多，只係預算40萬港元咋。

立法會綜合大樓喺2011底年啟用，啲硬件用咗近8年，時間唔長唔短，但科技日新月異，應該間中做吓更新，唔係接待外國官員或議員時，畀人見到咁落後就醜怪喇！