政Whats噏：靚女喻海濱　梁美芬叫幫手醫臭狐

政府打算斥資60億港元發展維港海濱長廊，不過多區海濱都被投訴「臭海」氣味強烈，搞到市民對海濱避之則吉。立法會議員梁美芬(Priscilla)今午(28日)喺一個委員會會議上就話，歡迎政府搞海濱，不過「如果靚女有臭狐」就感覺唔同嘞！其實Priscilla係以靚女比喻海濱，以臭狐比喻強烈氣味，希望當局做好啲清潔工作幫海濱醫病。

Priscilla話，海濱規劃爭取咗10幾年，終於等到政府做，而佢平時經常去荃灣碼頭、九龍東、土瓜灣、紅磡同大角咀海濱，海水氣味好強烈，認為發展海濱配合海水冇臭味先係完美、一個真正嘅政績。財政司司長陳茂波就話會同相關政策局講番情況，Priscilla就笑言即係要同環保局追數，認定當局實冇立項處理。