政Whats噏：理解基層怨氣　黃遠輝暗批政府唔掂？

政府全盤接納咗土地專責供應小組(土供組)嘅報告，小組主席黃遠輝終可搣甩「周永新2.0」嘅外號。小組任期今日(28日)屆滿，黃遠輝接受電台訪問時講到過去一段諮詢期，感受到基層冇得上樓嘅怨氣，仲話要反思，香港係發達城市，但係點解唔能夠解決艱難嘅住屋問題。咦！咁講，係咪暗批發展局局長黃偉綸搵地建屋不力呢？

老實講，政府搶先喺小組交報告就公布要倒萬億港元落海推出「明日大嶼」填海計劃，一度令人質疑架空土供組，還好最後政府都接受咗土供組包括收回具爭議嘅粉嶺高爾夫球場32公頃土地嚟建屋在內全套建議。

土供組嘅任期今日屆滿，有「公職王」之稱、銀行界出身嘅黃遠輝喺電台訪問中透露，喺呢一年半任期內瘦咗5磅，相信因之前小組工作密集，或多或少有壓力，但最近就回升3磅，希望可以去旅行放鬆吓，追番啲磅數。

點會無壓力吖！佢憶述喺公眾諮詢期間，面對過唔少批評，例如畀人質疑佢做戲，又聽過唔少粗口，亦都試過喺公開場合畀人攔截，直言如果自己一樣處於水深火熱中，住緊不適切居所，輸候公屋無望，一樣會咁多怨氣，所以諮詢過程可以令土供組學識謙卑咁話。

佢又話唔會忘記尖銳嘅批評同市民支持，仲話至今都仲記得探訪過嘅人嘅姓氏、家庭狀況等。跟住又話值得反思，香港係發達嘅城市，但點解唔能夠解決艱難嘅居住問題。

講到自己最深嘅感受係社會對土供組公道，如果政府全盤按照社會大多數民意，去選擇相應嘅土地供應，就係還社會公道。佢又話唔少人以為土供組係替政府工作，重申小組係同社會一齊解決土地問題，佢認為政府同社會並唔係對立，如果要選擇，佢一定會企喺社會嗰邊。

其實，住屋問題唔好話解決，依家根本紓緩唔到，基層市民何止怨氣大，簡直係民憤沖天，以黃遠輝坦言「一樣會咁多怨氣」、「學識謙卑」同埋一定會企喺社會嗰邊，好明顯係清楚自己嘅擺位，而佢話值得反思嘅係未能解決住屋問題，係咪暗批當局冇學識謙卑、冇聽民意呢？黃偉綸收到未呀？