政Whats噏：區諾軒改咗名叫「歐樂謙」？

過去唔少立法會議員都會「被改名」，包括漁農界議員何俊賢曾經喺請柬上被寫錯「何傻賢」、區議會(第一)劉國勳嘅橫額被改為「劉國動」。民主派嘅區諾軒就成為咗最新嘅被改名對象，「新名」就係「歐樂謙」，連姓都改埋添。

區諾軒喺Instagram發布咗一張上款寫有「歐樂謙」嘅相，仲話細個睇醫生時，啲護士都會咁樣叫佢，如果寫信人記得佢叫咩名，佢會開心少少。佢接受查詢時，就話封信係街坊寫嘅求助信，仲話細個唔止護士叫錯，就連學校老師都會搞錯。至於點搞錯法？佢話唔同配搭都出現過，仲試過因為有邊讀邊，被人叫做「區若軒」添。而且出錯嘅唔止中文，原來連英文都有人寫錯，事關區諾軒嘅英文譯名係「Au Nok Hin」，佢就話唔少人會將「Nok」變成「Lok」。

中英文名都被改過，區諾軒話自己同屋企人都已經習慣咗，好多時屋企人見到寫錯名嘅信，都知道係寄畀佢喎。佢仲解釋，因為「歐」比較多人用，而「樂」、「謙」同「諾」、「軒」差唔多音之餘，仲比較多人用，所以啲人搞錯都唔奇怪。佢仲話，依家去睇醫生，啲護士都唔會再叫錯佢個名，因為已經認得佢，仲叫佢多啲喺議會發言添。