涉偷香油箱被控盜竊　內地男辯稱：啲錢係神仙㗎喎！

西貢蠔涌車公古廟昨日(1日)發生盜竊案，一名男子在太歲殿捧着一個紙皮箱離開時，被姓溫廟祝的兒子揭發紙箱內裝有廟內一個香油箱，於是報警求助。37歲持雙程證男子譚文華被落案控以一項盜竊罪，今(2日)被押到東區法院提堂。

控罪指，他於本月1日於蠔涌車公廟，盜竊一個內有15,875.8港元及2.5元人民幣的捐款箱。被告拒絕使用免費的當值律師服務，選擇自行處理案件，當法庭要他答辯，問他是否認罪時，他首先表示：「啲錢唔係佢私人㗎喎，係屬於神仙㗎喎，世界上好似無邊個國家規定偷廟嘅錢係犯法㗎喎」。主任裁判官羅德泉回應：「其他國家我就唔認識，但我係香港嘅法官，響香港呢偷廟嘅錢係犯法嘅，我唔知你來自咩地方，或者有人以為廟啲錢係用嚟濟助好有需要嘅人，或者係屬於神嘅用嚟畀人濟急...」。

此時被告急於辯駁：「係囉，我都係諗住攞嚟幫人...」，羅官續說：「但響香港唔係你咁諗嘅」。此時被告又質疑：「佢(警察)都無響我面前開箱數有幾多錢，我點認啫？！個箱咁細點裝萬五呀？千五就得啫，佢(警察)可能呃我㗎係咪先？」羅官遂表示：「咁你咪唔好認囉，你有自由選擇唔認㗎，咪畀法庭審囉，叫控方證明個金額囉，如果你連偷都唔認咪審囉」。被告聞言又反駁：「咁你即係逼我認啫，咁我認罪係咪會馬上判先？」羅官明言並非逼他認罪，亦表示要考慮案情背景，未必可以即時判刑。

被告再表示沒有足夠時間考慮答辯，羅官強調他可以要求押後合理的時間作考慮，被告遂說：「咁我只係講多一句，我相信香港嘅法律係公平公正嘅」，羅官聞言立即回應：「你唔使講呢啲嘢，全世界都知香港法律係公平公正嘅」。對於案件要押後，被告似有猶豫一度表示：「如果押後都係一樣結果，我辯唔過你㗎喎...我認，但我唔同意個金額」，羅官遂解釋不會接納他在此情況下認罪。

控方則表示被告在港居無定所，雖然他無案底但是持雙程證入境人士，而且控罪性質嚴重，失物在被告身上當場起回證據確鑿，反對讓他保釋外出候訊。被告並無保釋申請，羅官將案押後至3月4日交回觀塘法院處理，屆時由該處的法官決定須要全面審訊或只是就失竊金額作紐頓聆訊，期間被告須還押懲教署看管。

臨離開前羅官更對被告說：「你放心啦，你一定會得到公平公正嘅審訊㗎」。被告此時似仍未明白：「咁啲錢係神仙㗎嘛」，羅官只好回他：「咁神仙嘅錢都係錢嚟」。