政Whats噏：傳王威信出選被拒退黨　葉劉話冇承諾過

元朗區議會副主席王威信近日退出新民黨，有傳係因未獲支持參選立法會。該黨主席、立法會議員葉劉淑儀證實有關退黨嘅消息，自言滿足唔到對方而和平分手，直言絕不介意，強調未曾承諾過派對方選立會。

立法會議員田北辰喺2017年退出新民黨，令到該黨立法會議席頓時由3變2，葉劉當時就話必定派人參選，首要係培養新人接班，當時政圈普遍睇好，當屆立會選舉時排名單第2、未有隨田北辰退黨嘅王威信，最大機會喺2020年為新民黨披甲上陣收復失地，所以政圈有傳該黨轉軚令王威信美夢落空，最終促成今次退黨。

葉劉接受查詢時證實王威信退黨，話對方有抱負，提出退黨時表明志不在區議會，因為本身係律師嘅王威信，律師收入比擔任區議員薪酬多，直言王想要乜嘢大家都明，奈何該黨未能滿足到對方，唔能夠作出承諾，所以大家都算係和平分手。

葉劉仲講明從來無承諾過2020年立法會選舉會支持王威信出選新界西，因為新界西9席當中已有5名建制派議員，難以再容納多1名建制派，重申新民黨好合理同計過條數。至於未有重奪田北辰退黨嘅席位，葉劉就話因短期內見唔到呢區有空缺，該黨長遠計劃應該要栽培人選，不過王唔退黨都唔會係首選，因為對方喺地區人緣唔好，而人緣則係選舉重要一項條件，所以毫不介意對方退黨，如果有其他政黨向王招手作出承諾，佢就祝福對方好運喇！

其實新民黨早喺舊年，內部已有聲音指唔應該派人出選下屆立法會新界西選舉，擔心欠缺基本實力下出選分薄建制派票源，反會令建制派議席減少，有該黨成員相信，王威信未能出選明年立會選舉係佢唯一退黨嘅原因。

至於王嘅最新動向，地區盛傳將會加入經民聯，佢接受查詢時證實退黨，但表明對其他事宜冇補充。而經民聯過往集中九龍西，目前只有4名屬新界西嘅區議員，立法會中則坐擁8席，但只有1席由地區直選產生，有冇實力將王威信送入立法會實屬未知。至於王早年獲委任為元朗區議會時為自由黨成員，但喺2013年退出轉投新民黨，今次係第二次退出政黨。

雖然唔知道王會唔會加入其他政黨，但咁啱得咁橋，佢今日(2日)喺社交網站上載咗張相，就係佢同實政圓桌嘅田北辰合照，仲留話「好耐無同舊老闆合照，希望唔好引起任何揣測」。呢啲係咪叫此地無銀呢？