政Whats噏:冇拉票甩轆 傳黎穎瑜喊冤

20190305
東網電視
更多新聞短片
據了解有其他政助教路,叫黎穎瑜多啲去立法會見吓人。
民政事務局上月甩轆,喺立法會人事編制小組委員會申請保留3個監察西九文化區工程嘅職位被否決,矛頭直指負責政治游說工作嘅民政局局長政治助理黎穎瑜(Jade)冇做好拉票工作。事後有政府中人透露,大家見到新聞後即刻去慰問Jade,當事人就「喊冤」話唔關佢事,係局方評估項目冇乜爭議,所以冇人叫佢去拉票,點知就出事嘞!
據了解,喺會議翌日(2月23日)、全城鬧爆佢當天,正好係Jade嘅生日,相信呢份生日「大禮」實係好難忘!而同Jade較為相熟嘅同事都知佢翌日生日,好好心安慰佢話大家都明白嘅,更有其他政助教路,叫佢得閒喺立法會見吓人喎。
正所謂「經一事,長一智」,據了解,Jade亦好聽話,上月25日嘅民政事務委員會開會,佢即刻入會議室內坐定定,等大家見到佢。姑勿論係局內錯估形勢,抑或係冇人叫拉票,作為政助就要好有政治智慧,只要有心由政總行過立法會都好容易,同議員打聲招呼,咁咪唔會頻頻出事囉!依家就好好諗吓嚟緊可以點補鑊,否則3個職位逾時冇得保留,就真係成為千古罪人嘞!