政Whats噏:鬧唐偉康亂噏 陸頌雄用App打小人

2019年03月06日 15:26
東網電視
更多新聞短片
陸頌雄喺社交網站發貼,用唐偉康做示範,教大家用App打小人。(陸頌雄Facebook)

今日(6日)係二十四節氣中嘅「驚蟄」,相傳呢日打小人有助擺脫霉運,驅走對自身不利嘅人。近年乜都講創新,立法會議員陸頌雄(Michael)就喺社交網站發貼,用美國駐港總領事唐偉康做示範,教大家用App打小人!

平時香港人都淨係識去鵝頸橋,搵專業「打手」幫忙打小人,未必好清楚要噏乜或點樣做。Michael就教路,先打開個App同相機,影低個小人兼寫名,再跟住口訣節奏搖動同拍打手機,將小人打到面部扭曲就大功告成。

Michael大讚打小人可以令心情舒暢兼練肌肉,一舉兩得,形容係「具有香港特色嘅風俗智慧」。至於點解係唐偉康?Michael就喺貼文到話,皆因唐早前「亂噏」、「衰多口」,佢仲刻意hashtag(標籤)咗美國駐港總領事館,免得唐唔知被人打添。

事緣唐偉康早前就話,內地政府對香港施壓,會衝擊香港政治生態和營商環境,若修訂《逃犯條例》,或會影響美國和香港雙邊協議的實施。

至於十幾位民建聯嘅社區主任同區議員,今日就持「強烈譴責美領事抹黑一國兩制」橫額,大嗌「停止干預內政,堅決打擊分裂國家行為」口號,到美國駐港總領事館抗議同遞信。觀塘區議員顏汶羽話,對於唐偉康的偏頗和不實言論甚感失望。他們希望唐偉康除咗繼續保持同香港的正常聯繫同交往之外,亦要放下偏見,尊重港府依法取締鼓吹港獨的人士和組織,以符合憲法和基本法的憲制責任喎。