政Whats噏:劉慧卿鬧爆張建宗唔掂 叫劉燕卿上位

20190307
東網電視
更多新聞短片
劉慧卿(左)推薦劉燕卿(右)做政務司司長,後者隨即婉拒。(鄧學修攝)
政府高官理應係有能者居之,所以實績平平嘅政務司司長張建宗早前一度爆出會離任嘅傳聞,雖然至今張仲在任,不過民主黨前主席、前立法會議員劉慧卿(卿姐)今日(7日)竟然喺網台節目上,建議申訴專員劉燕卿(Connie)頂上司長個位?
原來當時Connie講起任內嘅實績,解決咗唔少問題,卿姐見狀就即刻提起近年政府經常解決唔到問題,房屋、醫療、交通樣樣唔掂,仲同Connie講:「早排聽聞政務司司長個位有空缺,早知就搵你去幫吓手解決問題啦!」唔通卿姐想叫Connie出任政務司?Connie當然隨即婉拒,謙稱自己「邊有能力」!
不過講到Connie即將卸任申訴專員一職,佢就話因為年紀大,所以決定花多啲時間陪屋企人,暫時未有打算再任公職。事關佢忙咗咁多年,實在太少陪屋企人,多少有啲歉疚,例如佢個女細個時要每日簽手冊,但Connie因為工作關係未必成日見到個女,所以一簽就要簽晒成個星期,次次個女見到都好唔開心,跟住就喊!所以嚟緊會花多啲時間陪個孫咁話。