政Whats噏：鄭松泰何君堯無緣同台　隔空鬥寸嘴

香港大學學生會政治及公共行政學會今午(12日)舉辦一個研討會，以學術角度討論民粹與民粹民主。出席者之一嘅立法會議員鄭松泰朝早喺社交網站發貼，話係以為另一立法會議員何君堯會出席先至答應去，言語間透露出點點失望，唔通佢覺得畀人呃？

鄭松泰回覆時話，唔可以話係呃，不過何唔去就真係會考慮吓先。點解想同何同台？佢就話，一個論壇應該要有正反兩面，指離開會議廳辯論就唔使理會議守則，可以毫冇顧忌咁「收拾佢(何君堯)」，揭開佢嘅歪理，可惜最尾同學生講唔得閒嚟。

何君堯則話依稀記得一早回覆咗唔得閒到場，豪言自己向來都係「逢請必到，逢到必早」，但今日真係有事。問到點睇鄭松泰對佢唔出席感到失望，佢就話鄭鍾意「砌佢」，但又砌唔到，成日踩蕉皮跣低，笑言下次有機會咪一齊砌囉。縱使兩人無緣喺研討會激辯，但各自回應都已經火花四濺，相信同台的話必然會「妙語連珠」！