政Whats噏：立會小組難產　調整工傷賠償延兩周

勞工及福利局根據既定機制，每兩年調整一次《僱員補償條例》、《肺塵病條例》及《失聰補償條例》所規定嘅補償金額，當局喺上月底已預告將於下周三(20日)嘅立法會大會上動議擬議決議案，不過至本月初突然公布撤回，據悉當局將重新預告喺下月3日提動議。因乜解究咁簡單嘅調整都要翻來又覆去？

據了解，事緣街工立法會議員梁耀忠(阿忠)早前喺內會提出，要求就是次擬議決議案成立小組委員會，勞福局就必須撤回動議，點知委員會報名人數唔夠法定人數「難產」，政府就要重新預告，預計下月3日可提出動議。東網今早(14日)曾就事件聯絡阿忠，但佢因事忙暫未回覆。

政府消息人士指，本來預計可於下月中實施新例，依家就要延遲約兩星期，但如果成立委員會，就要等到預算案審批完先可以處理，到時則要延誤兩個月。就算議題幾冇爭議，議員係有權要求成立小組委員會，認真審批項目，如果政府早啲交文件，可能就唔使咁論盡喇。