政Whats噏:批陳茂波忽略需求 學生夠秤就輪公屋

20190314
東網電視
更多新聞短片
陳茂波(台上中)今日與一班中學生大談財政預算案。(溫國佳攝)
學生時代應該係最無憂無慮嘅時候,不過財政司司長陳茂波今日(14日)與一班中學生大談財政預算案,就發現唔少學生擔心上車無望,更有人提到唔少人一滿18歲就申請公屋,到底房屋問題有幾咁嚴重呢?
有學生批評陳茂波只着眼房屋供應,忽略需求方面,因為每年有唔少年輕人年滿18歲就立刻申請公屋,原因係對將來買樓缺乏信心,認為政府要諗方法增加年輕人上車嘅信心囉。
陳茂波就話無辦法阻人申請公屋,要根治年輕人擔心買唔到樓而輪候公屋問題,就要從房屋供應着手,等佢哋知道供應陸續有嚟,需要時亦負擔到就唔會心急。
另外,有學生關注教師壓力,批評政府寧願將資源投放喺公廁,都唔解決老師壓力問題,反問教師自殺係咪比唔上公廁重要。陳就話對近日慘劇心痛,但未搵出事實前不宜評論。佢續指,公廁與教師自殺不能相比,重申唔會因而削減教育資源,仲話女同學急都唔願用公廁,所以改善公廁有需要喎。