政Whats噏：黃定光自嘲舊電池　傳接班人二揀一

人生有幾多個十年！對於立法會進出口界議員黃定光(象哥)嚟講，連埋明年將會係擔任中華出入口商會(中出)代議士嘅第16個年頭，外界關注此4年又4年時間，基於各種原因，象哥都要再坐一會未能交棒，半年後將踏入70歲嘅象哥係咪會再連任呢？象哥今日(16日)就疑似暗示有意退下火線，一方面自嘲係「舊電池跌watt」，另一方面又慨嘆「仲做乜嘢，捱咗16年」。不過被問到邊個係真正接班人，象哥就三緘其口，只願意確認人選包括兩名中出副會長黃英豪同許華傑(Michael)。

立法會內五大商會代表誰屬，一直備受外界關注。自從2004年開始，象哥一直擔任進出口界議員至今，雖然於2012年同2016年換屆時都曾傳出象哥有意交棒，但結果都係以不變應萬變，疑似接班人均無緣從象哥手中接班。

其中等咗7年仍未能「升呢」嘅就係已故進出口界議員許長青嘅仔Michael。雖然佢一直默默耕耘，近年更拍住象哥跟出跟入，但政界就有傳Michael可能再次同議席擦身而過，因為有指中出部分領導對佢嘅私人生活有意見，轉而力邀早前官非纏身、但依家已事過境遷嘅律師黃英豪接棒。

雖然象哥口講接班人選未定，亦唔存在私相授受，最重要人選係需要獲得業界嘅共識認同，然而對於兩名疑似接班人黃英豪同Michael，佢就罕有地評論兩人嘅傳聞。象哥話睇住Michael成長，覺得對方比較熟悉業界，而被問及有傳中出部分領導對Michael嘅私人生活有意見時，象哥就話唔知呢個說法從何而來，只係話Michael曾離婚，呢個係過往嘅事情。

至於黃英豪早前捲入官司，象哥就形容呢個係商業糾紛，有關矛盾爭議已經得到法律解決，佢又提到自己同黃係多年朋友，對方本身係律師，熟悉法律問題喎。

不過講到底，業界疑似接班人能否更上一層樓嘅前提係象哥願意退下火線，否則一切都只係紙上談兵。對於明年會否於進出口界角逐連任，象哥自言「七張仲連任，抖吓啦！」究竟呢句係真心話，定係以退為進，外界唔係象哥肚入面條蟲，約一年半後自有分曉。