政Whats噏：參選路止步　羅冠聰暑假耶魯讀碩士

喺2014年違法佔領行動(佔中)有份衝擊俗稱「公民廣場」的政府總部東翼前地嘅「雙學三子」，繼學聯前秘書長周永康出走，到美國加州大學柏克萊分校攻讀博士後，另一名學聯前秘書長、因宣誓風波被DQ立法會議席嘅羅冠聰，亦表明暑假會入讀美國耶魯大學東亞研究系，修讀一年嘅碩士課程，課程聚焦中國研究。唔通係自知參選之路止步，而有份創立嘅香港眾志又變成壓力團體，所以出走？

喺嶺南大學文化研究系讀足6年終於畢業嘅羅冠聰尋日(16日)喺Facebook貼文，話喺佔中成為市民口中的「學聯五子」，到創立眾志、成為立法會議員、在囚，佢都冇機會好好咁安坐課室內學習，而係面對更大嘅風浪，喺湧流同暴風中成長。

佢話最近獲得耶魯大學東亞研究系全額獎學金，喺今年暑假負笈美國升讀一年嘅碩士課程，而課程係聚焦喺中國研究上，仲話「離開是為了回來」，喺充實自己過後，仲會返回到自己歸屬嘅土地上奮鬥。

「雙學三子」黃之鋒、羅冠聰同周永康喺2014年9月衝擊「公民廣場」，其後被裁定非法集結等罪成立，分別判社會服務令及緩刑，律政司及後提出刑期覆核，3人被改判入獄6至8個月，而羅冠聰判刑最重，達8個月。直至去年初，終審法院裁定三人上訴得直，恢復原審判刑，即三人毋須入獄。