政Whats噏:抱狗舊po遭圍剿 陳肇始被轟大話精

2019年03月17日 18:07
東網電視
更多新聞短片
陳肇始抱住狗狗嘅舊post,有網民留言大罵政府「草菅狗命」。(互聯網)

到底政府有幾重視動物權益?就因為早前一隻泰國小狗疑走失後誤乘貨櫃船抵港,被漁護署帶走及人道毁滅,再次惹起極大爭議,唔少網民更翻食物及衞生局局長陳肇始嘅舊帳,喺網上圍剿佢,不但大罵政府「草菅狗命」,仲鬧佢係大話精。

翻乜嘢舊帳?講緊嘅係陳肇始舊年5月8日喺Facebook上載咗一張抱住狗狗嘅舊照,當時貼文話當局同市民一樣都愛護動物,所以很明白市民嘅心情,又話為咗進一步保障動物福利,承諾會通過修例及加強執法,仲附加「#愛護動物」、「#動物福利」、「#虐待動物可恥」、「#聆聽」、「#溝通」同「#行動」等標籤字句。

當時呢個post出咗之後,好多網民要求陳肇始要講得出做得到,亦叫佢唔好雷聲大雨點少,要維護動物權益,同埋叫佢要阻止虐殺動物嘅行為。

之但係喺發生泰國小狗事件後,呢兩日有好多網民搵番呢個post,留言大罵政府講就天下無敵,又鬧爆漁護署處理手法絕不人道,亦有人批評陳肇始縱容手下胡亂殺狗,「草菅狗命」,又大罵漁護署係劊子手,更有網友鬧陳係大話精,應該為泰國小狗被漁護署害死出來道歉,甚至請辭。