政Whats噏：怕街坊撈亂　鄭達鴻徒弟轉Look

唔少後生仔打扮好類近，有時大家行埋一齊都會好易認錯。東區區議員鄭達鴻同佢徒弟李予信都係後生仔同埋眼大大，企埋一齊或者會撈亂。為免街坊分唔清，李予信就特登戴眼鏡示人，不過佢就話啲街坊其實分得出佢同鄭達鴻。既然街坊都分到，咁佢轉形象咪浪費心機？

其實李本身都有近視，未轉形象之前就戴隱形眼鏡，所以一路啲卡片同橫額上嘅佢都係冇戴眼鏡。依家佢戴番眼鏡，街坊就更容易去分辨佢同師傅鄭達鴻。眼大大嘅李予信就透露，曾經有人話佢似藝人余文樂，但佢就唔太鍾意畀人咁講喇。

有十年跳街舞經驗嘅李，上年喺中大嘅跳舞比賽仲拎過冠軍，而佢本身跳開Breaking Dance。講開跳街舞，不得不提都有跳街舞嘅民主黨立法會議員鄺俊宇，李就話鄺跳嘅種類比較多，而且以前跳街舞係要靠睇錄影帶自學，所以都幾欣賞對方。被問到有冇諗過同對方比併，李就話有機會都想。唔知鄺俊宇又接唔接受挑戰呢？