政Whats噏:政府同攤檔傾掂賠償 疑架空民意代表

2019年03月17日 23:00
東網電視
更多新聞短片
政府傾掂數後唔單聲,立法會議員被蒙在鼓裏。(設計圖片)

政府去年預留20億港元大搞為期10年嘅街市現代化,其中大圍街市安裝空調系統及改善工程,亦都順利喺去年獲立法會批出撥款,上星期三(13日)政府同商販代表落實咗各項工程細節及時間表,不過,一直跟進開嘅區議員同埋立法會議員就被蒙在鼓裏,唔通真係過咗海就係神仙?

食物及衞生局副局長徐德義去年6月親自上陣,就涉款逾億港元嘅大圍街市安裝空調系統工程到財務委員會尋求撥款,最終大比數獲得通過。不過當時商販嘅安排仍未有最終方案,唔少議員喺會上都擔心街市全封閉時間太長,搞到商販手停口停。政府最初只肯提供3個月免租期,令到唔少商販不滿,因而尋求立法會議員介入協助。

翻查資料,商販曾多次不滿意免租安排,過程有立法會議員參與。上星期大圍街市管理諮詢委員會終於落實咗安裝空調工程,將於今年5月起分3階段進行,街市只會喺最尾階段全面封閉7個月,至於商販嘅免租安排,就多咗免收一年冷氣費嘅措施,據了解呢啲細節係由食環署副署長陳靜婉喺3月初與商販傾掂嘅。

整個工程安排終於有定案,而且商販亦有更多優惠,聽落好似皆大歡喜。不過,立法會研究公眾街市事宜小組委員會主席柯創盛就話,政府同商販成功達成共識解決糾紛,當局都應該有需要通知曾經介入過嘅議員,大嘆當局有架空立法會之嫌。睇番呢個委員會工作由去年3月展開,共舉行咗7次會議,工作期限喺今個月初屆滿,但柯仔話一直以呢個委員會主席身份約見食衞局同食環署,就算委員會完成工作都應該知會一聲喎。

有份協助嘅立法會議員葛珮帆話,曾經就免收一年冷氣費與部門傾談不果,再隔一排就獲悉部門直接同商販傾妥,佢向政府求證消息時不獲回覆,直言覺得好勞氣,唔知對方咩心態。佢強調議員一心想大團圓結局,但係食環署嘅做法莫名其妙。

立法會對事態發展後知後覺,其實地區層面亦一樣,好似大圍街市管理諮詢委員會成員、沙田區議員董健莉,都係從商販口中得悉部門直接與商販傾好方案,政府部門就解釋指時間倉促,前排又忙於同商販傾喎!難怪董健莉大嘆新方案雖然釋出善意,但欠缺透明度,亦唔尊重民意代表喇!東網曾向有關政府部門求證,未獲回覆。

話時話,政府成日話要改善行政、立法關係,今次連同幫過手協調嘅民意代表打個招呼都懶,又點期望長期保持良好關係呢?