政Whats噏：不務正業　區諾軒開會拆郵包

學生上堂成日偷偷地匿喺櫃桶做違規事，而今日(18日)立法會一個委員會上，就見到議員區諾軒個樣好興奮，但又帶點鬼祟喺枱底有所動作，到底搞咩呢？

話說今日立法會《2019年吸煙(公眾衞生)(修訂)條例草案》委員會召開首次會議，選緊副主席時，見到區諾軒好開心咁拎住個包裹，仲好努力嘗試拆開，點知主席郭偉強一句「出嚟拆喇」，就令到佢放返落枱底，不過佢要拆包裹嘅決心並無熄滅，密密喺枱底繼續，最終順利拆封。

事後問番區諾軒，佢就話只係拆網購包裹，而且只係幾本與政治學有關嘅二手書。佢話自己向來少去實體書店，所以養成喺網上買舊書嘅習慣，價錢又平啲。佢仲話現時好多人放二手書，就連圖書館嘅舊書都有，今次呢幾本書就連圖書館嘅標籤都仲未搣走添。佢更話有幫襯唔少網購平台，但就無用過淘寶，而用親都係買書為主喇。