政Whats噏：邵家臻患糖尿　四眼變獨眼龍

糖尿病是常見都市病，社會福利界立法會議員邵家臻本身唔止患有濕疹，仲有糖尿病。最近佢仲發現自己糖尿上眼，醫生建議佢去打針，一個療程要打3支針，今日(19日)打第一針。由於支針係打落隻眼度，所以邵家臻打完針需要用紗布遮眼，本已「四眼」嘅佢就變咗獨眼龍。

邵家臻日前話，最近去咗做身體檢查，特別睇睇自己嘅糖尿病問題。點知佢就發現膽固醇超標，而且糖尿失控上埋眼，仲話難怪自己呢排睇嘢都矇矇哋咁。佢就解釋，話病理上嚟講係叫「黃斑水腫」，治療嘅方法就係喺右眼打針，然後等消腫、放水、同埋減壓，而打完針之後睇嘢都會矇矇哋，所以佢已經向立法會請咗假休息喇。