政Whats噏:岑智明訪災區 網民問高官去晒邊?

20190319
東網電視
更多新聞短片
岑智明隔籬棵大樹被吹到連根拔起。(互聯網)
超強颱風「山竹」去年襲港,威力同殺傷力有幾大,當時梗係感受到,但隔咗咁耐,大家可能記憶淡咗好多嘞!
唔知係特登抑或咁啱得咁橋,天文台台長岑智明喺山竹襲港剛過半年,去咗大浪灣遠足。佢喺社交網站Facebook上載咗相片同短片,可以睇到鹹田灣塌樹處處,附近亦滿布垃圾同爛咗嘅家具。
岑台長貼文話當日探訪咗鹹田灣安記士多嘅溫水生,了解到山竹對鹹田灣嘅破壞嚴重,到依家仍然未完全復原, 而引述溫生話喺大浪灣嘅破壞,山竹比溫黛更厲害,所以人稱「香港的馬爾代夫」嘅大浪西灣遇到嘅破壞都係非常嚴重,仲話睇嚟呢個世界級後花園還需要多啲有心人幫手,先至可以回復昔日嘅美景嘞!佢仲話天文台義工計劃先去東平洲幫手執垃圾。
呢個post出咗之後,引起唔少網友關注,佢哋話早兩個月前去鹹田灣依然滿目瘡痍,而喺浪茄仍有唔少倒塌嘅樹木有待清理,仲有網友質疑:「台長都尚且去探望鹹田灣居民,我哋港府嘅更高層官員去晒邊呢?」咦!班高官聽唔聽到呀?