港男力爭2蚊回水　車長寸爆　網民：打和啦

正所謂「錢唔係萬能，但冇錢萬萬不能」。近日有大叔為了2蚊，向車長窮追不捨，最後更險變成罵戰？

填詞人梁栢堅星期二（19日）在其Facebook專頁講述事件，指有戴眼鏡的中年男子在中環上巴士，對車長表明上一趟車的司機忘記調整收費，欲「呢程畀番少啲」。司機拒絕，建議他自行詢問巴士公司。

其後大叔站在司機位旁，致電客戶服務中心，梁栢堅指：「原來佢之前搭另一架收多咗佢兩蚊」。待抵達銅鑼灣後，大叔才嘟卡準備落車，並說︰「麻煩晒車長」。

未料司機竟然沉不住氣︰「唔麻煩呀，你鍾意玩我同你停低架車慢慢玩都得！」大叔感到愕然及不忿，落車後走至車頭指罵司機︰「依家你係返工㗎唔係玩嘢！」司機遂駁斥︰「嗰兩蚊喺度搞咁多嘢喺度追，唔知以為爭你廿萬！」

不少網民直斥︰「其實呢個位置大聲講電話已經可以趕落車」、「行車時請勿與司機談話」。有人則支持大叔︰「唔係錢嘅問題，係原則嘅問題」、「一個人就2蚊，1萬個人就2萬了」、「人哋先生有禮貌，全程態度好好，係個司機反應大啫，有咩問題？」

---------------

《港呢啲》：大事小事騎呢事，東網嚴謹選題，輕鬆製作！