政Whats噏:啟德單軌冇動工時間表 黃偉綸砌詞再拖

2019年03月20日 14:08
東網電視
更多新聞短片
架空單軌列車毫無寸進,議員追問下黃偉綸才稱沒有推展時間表。

開講有話「一動不如一靜」,政府近年都係用呢個態度做事,實行以不變應萬變,但唔代表唔使被追數同炮轟。政府銳意將九龍東打造成第二個核心商業區,擬建架空單軌列車貫通,但拖足12年都毫無寸進,發展局局長黃偉綸今日(20日)終於承認依家冇推展時間表。呢個項目都玩咗兩輪諮詢、三次研究亦冇結果,唔通想側側膊拖到胎死腹中?

立法會九龍東議員柯創盛(柯仔)今日喺立法會大會提口頭質詢,關注港鐵觀塘線載客量已飽和,擔心將來興建單軌車會難以負荷額外乘客量,問當局幾時先可以交到最終方案同向立法會攞撥款。黃偉綸回應時就講番成個計劃嘅前世今生,不認不認還須認,最後就話仲做緊詳細可行性研究,搞掂之後先籌劃項目未來路向,現階段未有準確嘅推展時間表,今年就唔可能㗎喇!

柯仔聽到好火滾,一嚟就鬧黃偉綸答完等於冇答,喺度玩拖字訣,拖足12年都冇作為,擔心將來計劃落實時會唔會唔能夠與時並進,更質問政府幾時先有時間表,可唔可以對市民有啲承諾。柯仔事後再批評政府面對問題時因循守舊、欠缺魄力同承擔,將再約見局方跟進兼要求喺發展事務委員會討論。

黃偉綸回應時話「分享」議員感受,但項目有好多技術挑戰,舉例建議單軌經跑道末端連接開源道,嗰度屬於舊區道路狹窄,設置架空列車或未能滿足消防條例,以及路經觀塘避風塘亦受保護海濱相關條例規管,且如要剔走有關避風塘會令全港避風塘面積不足,需要覓地重置等。佢又話起動九龍東辦事處喺區內試行緊唔同智能系統,可以更有效使用路面,反建議議員考慮單軌車駁港鐵係唔係可以做到分流?

計劃本來預計今年動工、2023年啟用,黃偉綸提嘅都係「老問題」,好似避風塘嘅跨海大橋,地區有共識起高啲畀大船入,唔係冇方法解決。相信最關鍵,係早年地區擔心票價唔高,人流不足,單軌收入唔夠支援營運,政府又唔知貼唔貼錢好。拖咗咁耐都計唔掂數以為唔提就唔使理,本來話用120億港元可以搞掂,十幾年乜都貴晒,再拖就只會愈來愈貴,到時政府係咪又有藉口話造價高、效益低唔做呢?