政Whats噏:一帶一路冇人關心 陳百里嚇呆

20190320
東網電視
更多新聞短片
陳百里企起身問:「個跟進問題係?」(吳艷玲攝)
平時立法會大會嘅口頭質詢,唔少議員都會提出追問。立法會今日(20日)恢復開大會,唔知係咪放咗兩個星期假嘅關係,啲議員似乎對啲議題都唔多關心,喺其中一條口頭質詢上仲要冇人追問,以極速8分鐘內搞掂,負責回應嘅商務及經濟發展局副局長陳百里仲呆晒咁樣添。
話說紡織及製衣界立法會議員鍾國斌問到有關政府喺2016年設立一帶一路辦公室嘅工作成效、人手編制同埋未來工作計劃。陳百里回應時話計劃今年年中會召開第二次一帶一路聯席會議,而且會籌備外訪、同埋喺今年九月再搞一帶一路高峰論壇。
就喺陳百里回應完後,鍾國斌就話成個立法會都冇人喺度,唔知係咪自己條問題好無聊定冇用,仲反問主席唔知有冇見過依個場面。佢仲話一帶一路係國家重要嘅政策,但喺香港議會竟然冇人跟進,所以佢都話自己冇跟進問題。其實當時除咗鍾國斌,只有社福界立法會議員邵家臻喺會議廳內。
之後立法會主席梁君彥仲請局方發言,陳百里企起身就呆咗咁問:「個跟進問題係?」鍾國斌就再講多次話自己冇跟進問題,梁君彥先話開始下一條口頭質詢,唔知梁君彥係咪都俾個場面嚇親呢?