政Whats噏:環運會主席沈祖堯 唔識用環保飲管

2019年03月21日 17:45
東網電視
更多新聞短片
沈祖堯(右)身為環境運動委員會主席,但就唔識用環保飲管。(梁家寶攝)

中文大學前校長沈祖堯早前接任環境運動委員會(環運會)主席後,今日(21日)返母校皇仁書院幫手介紹下星期五、六(29日及30日)嘅開放日,當日會賣環保飲管、毛巾同可以減少用遮袋嘅「反向傘」。點知沈祖堯攞起支不銹鋼環保飲管就唔識用,仲將幼飲管放入粗飲管,好似想駁埋一齊咁,後尾要大家教佢才知係分開用,原來佢首次見呢種飲管喎!

環境局局長黃錦星同環運會前主席林超英成日鬥電費少,沈就話自己「冇得鬥」,二人「天冷都沖凍水涼,我搞唔掂」,太太幫佢交電費,所以佢都唔知幾多錢,不過屋企都較少開冷氣,有時仲會因此同家人有爭拗,有時家人剛開完,佢就關,平日都會盡量環保啲,例如跑步會帶水樽毛巾出街,紙又會盡量重複用。

沈祖堯就話,當初黃錦星搵佢接任環運會主席時,佢都唔知有咁大責任,仲以為係某樣比賽要佢做評判添。講起環保同衞生之間會唔會有好多衝突,沈就話,自從沙士後,醫護人員着多咗好多保護衣物,又用多咗好多口罩,例如自己每日做好多胃鏡腸鏡,就算每日做10個,每做完一個個案就要跟指引丟一件保護衣物,即係每個個案要丟4件,覺得好浪費,仲同過護士長爭拗,「我真係做咗幾廿年都冇事喎」,質疑如果冇埋到枱、冇接觸病人,係咪真係要咁丟呢?覺得如果冇國際指引,就可以慳啲。」