政Whats噏：天花亂墜評運輸　張炳良任內乜都冇

近年運輸及房屋局似是烏雲蓋頂屢爆事故，搞得頭嚟又醫唔到腳，認真係鑊鑊新鮮鑊鑊甘。但運房局前局長張炳良就因為「無官一身輕」，今午(21日)出席一個講座時，逐項點評政府運輸政策，由港鐵唔應該上市，講到三隧分流應該全部都加價，紅隧仲係必然要加，又希望現任局長陳帆「有吉士(Guts)」推動電子道路收費，豪言「香港冇基建係大白象」。講到咁輕鬆，張炳良在任時有權力又乜都做唔到！

已重返教育界嘅張炳良終可以輕鬆以理論分析事局，今日就喺教育大學講「公共交通和運輸基建的政治」。佢以巴士線做例子，話依家好多巴士線可以合併或重組，有好大空間去改進，但做局長嘅經驗係一話重組地區就會嘈，簡單到移開巴士站都唔得，慨嘆運輸問題因為有政治因而做唔到。

佢又話，港鐵上市係錯，當官方委任董事坐入董事會就受到法例規管，要顧全小股東利益，唔可以亂咁話減價就減價，作為規管者及董事，有時要避免利益衝突避席，好多嘢都做唔到。佢更提到基建不時有超支同延誤，但原來全世界都有，香港好彩冇基建係大白象，好似曾被批評係大白象嘅西鐵線已經好多人搭喇喎。