政Whats噏：被問擔唔擔心坐監　戴耀廷稱唔羞愧

違法佔領行動(佔中)發起人「佔中三子」戴耀廷、陳健民、朱耀明等9人，被控以煽惑公眾妨擾等共6罪，下月9日裁決。三子曾經講過會承擔責任，但最終否認控罪，身兼港大法律系副教授嘅戴耀廷今日(24日)出席一個活動，被問到擔唔擔心坐監時，佢更聲稱唔恐懼亦唔羞愧喎。

佔中喺2014年爆發，行動長達79日，而喺佔中前曾進行佔中預演。被問及點睇參與佔中預演嘅人士仍未被檢控，戴耀廷指要問律政司，因為律政司有其檢控嘅守則。再被問及包括佢在內等9人被控以煽惑公眾妨擾等罪名，擔唔擔心會坐監時，佢就話公民抗命預見有機會發生呢樣嘢，所以唔會有恐懼同羞愧，無論結果係點，佢都係欣然去面對。

「佔中三子」面對一項串謀作出公眾妨擾、一項煽惑他人作出公眾妨擾及一項煽惑他人煽惑公眾作出公眾妨擾罪。三子曾經講過會承擔責任，最終否認控罪，而「佔中三子」喺本年1月底去台灣出席論壇，當時戴耀廷又再講唔會接受罪名，但如果坐監能夠燃起港人希望都值得喎。