政Whats噏：政府文件欠詳盡　建制照鬧冇面畀

政府申請撥款要經過立法會多關，先要去事務委員會作諮詢，最後先到立法會財務委員會審批，不過今日(25日)一個事務委員會上就有議員批評政府文件太簡單，唔通政府連過冷河呢個步驟都有所輕視？今次仲要連建制派都睇唔過眼出聲鬧添！

立法會設有18個事務委員會，討論相關範疇嘅政府政策過冷河，而工程項目過完事務委員會仲有工務小組，獲得前兩者先後支持先輪到財會審批，可以話要過足三關先拎到錢動工。不過，喺今日嘅民政事務委員會討論涉款1億港元，喺長洲興建社區會堂暨民政諮詢中心時，官員就只提供一份5頁紙，當中有2頁為圖則，實際上文字只得3頁嘅文件。

而負責嘅民政事務局局長劉江華亦有喺會上發言介紹文件，但只講咗35秒，連委員會主席郭偉強都忍唔住形容為簡短嘅介紹。文件又薄、簡介又短，難怪有建制派議員不留情面批評文件太簡潔，佢就係來自與工程相關嘅界別，建築、測量、都市規劃及園境界謝偉銓喇！

謝偉銓就話增加社區設施應該好少人反對，原則上又點會唔支持咁話，但佢就批評文件內容咁簡潔並非太好，因為事務委員會要決定是否支持，睇吓係咪回應到急切問題，例如係咪地盡其用等，當局可以用圖則表達出來，而自己作為專業界別都想睇多啲咁話。佢仲話簡潔介紹項目，變相要議員花時間問基本資料，令到討論唔夠充實同深入。

劉江華聽完都有立即補飛，話議員希望有更多資料去了解係無所謂，會好樂意提供咁話。不過謝偉銓之後就繼續深入發問想要多啲數據，又批評圖則無顯示土地用途同面積分配等基本資料，認為項目用公帑之餘又用埋珍貴嘅土地資源，要睇清楚有冇善用土地，而有啲議員熟悉當區情況咪一早明白，但並非每一位議員都熟，希望劉江華可以留意下咁話。

不過之後都有議員呵番劉江華，今次竟然係激進泛民陳志全，真係世界變喎！陳志全同樣話文件簡單，但今次未有與其他工程項目夾埋一齊去傾，令到有充足討論時間都幾好喎。

仲記得財會審批進度緩慢時，財會主席陳健波都經常話已經喺事務委員會同財會轄下小組傾過，但今次政府連過冷河都咁求其，以後呢個劃線藉口係咪再無說服力呢？