政Whats噏：一舊雲被指發夢　嬲爆要何君堯收回言論

立法會議員黃碧雲今日(28日)喺立法會討論校本管理時，講起如果校董好似建制派議員張國鈞(Horace)咁忙，做校董「開會都唔得閒睇文件啦」，惹來另一建制議員何君堯不滿，指黃碧雲可能自己發緊夢、「一舊雲」，點可以話Horace唔睇文件，可能係講緊自己嘅心聲。

黃碧雲發言時，以Horace咁忙為例，「你叫佢做校董，佢可能都唔得閒去開會啦，開會都唔得閒睇文件啦，有冤情都唔得閒理啦，咁多苦主周街都係」。何君堯發言時就話，校本管理有成個法團一齊做，「突然之間你講到啲法團好似個個坐喺度發緊夢，黃碧雲可能佢自己就發夢」，講緊自己嘅心聲，將心比己嚟比人哋，「你點知張國鈞唔係超人啫，人哋日理萬機，但你就日理可能兩部機」，質疑黃點可以話人唔睇文件，「你自己唔睇，你自己就吞pot(偷懶)，應該教書嘅時候唔教書，走嚟呢度廢噏」。

黃碧雲反斥何君堯不知所謂，要求佢收回言論，指佢不恰當揣測其意思及抹黑，「咩叫發緊夢呢，咩叫做應該做嘅嘢唔做」。代主席李慧琼問何有否揣測議員嘅目的，何就指完全冇，「因為佢真係一舊雲」，拒絕收回言論，反指黃對張國鈞的批評沒有事實基礎。

被問到係咪指黃碧雲係「一舊雲」，何反問「佢個雲字點寫架，sorry，我唔係好清楚，可能我都一舊雲」。黃碧雲重申要求何收回言論，李慧琼問是否要求裁決「一舊雲」係侮辱性言詞，黃就話唔係，係要求裁決何關於自己所有侮辱性發言、不尊重及揣測動機。李慧琼就指，過去喺議會都普遍有互相批評情況，提醒大家對事不對人，亦唔好使用侮辱性言詞，認為何係回應黃嘅言論，但提醒何避免用侮辱性嘅字。何就指從無侮辱人，「己不自侮別人焉能侮之」。