政Whats噏：鍾樹根飛甩老婆　四女相伴食鹹蛋糕慶生

前立法會議員鍾樹根(樹根)冇做議員後經常去玩周圍飛，前晚佢就難得喺香港同朋友食飯，仲有4位女士相伴添，真係羨煞旁人。不過，4位女士之中，就唔見經常同佢形影不離去旅行嘅老婆，樹根竟然咁斗膽「飛甩」老婆？點知佢就話，飯局中幾位女士都係廿幾到三十幾歲，驚老婆去會有代溝喎。

樹根昨晚(29日)就同民建聯黨友東區區議員植潔鈴、葵青區議員郭芙蓉、荃灣區議員林琳及葵青區社區主任梁嘉銘一齊食火鍋烚吓烚吓。佢話因為明日(31日)係佢生日，所以幾位「靚女」就相約同佢慶祝，大家知佢唔食蛋糕，仲特登訂造咗個「鹹蛋糕」畀佢、即係壽司蛋糕喎。樹根仲話，佢哋幾個有個共通點，都係好為食。

問到生日正日會點樣慶祝，老婆會唔會為佢煮生日大餐，樹根就話佢不嬲唔慶祝生日，今日都只係一家人出街食餐飯，費事老婆洗碗，平時只有個女生日，老婆先會煮大餐，笑言自己係屋企「邊緣人」，認真搞笑。