政Whats噏:力銷三隧分流 運房局埋單使169萬元

2019年04月01日 19:08
東網電視
更多新聞短片
運輸署製作了多條橫額宣傳三隧分流,涉款約1.7萬港元。

政府提出嘅三隧分流議案日前已「壽終正寢」,當局疊埋心水等收回西隧再算。不過,建議自去年《施政報告》提出,運輸及房屋局隨後鋪天蓋地式做宣傳頂住反對意見,包括曾派副局長蘇偉文粉墨登場扮茶客歎咖啡硬銷方案,原來「埋單」計使咗近169萬港元!

運房局回覆查詢時指,局方同運輸署分別喺部門網頁同社交網站發放20條宣傳短片,亦透過不同媒體嘅網站、手機應用程式及Facebook網頁落廣告做推廣,製作短片同廣告嘅開支共約167萬港元。而運輸署亦製作了多條橫額掛在港九不同地方,涉款約1.7萬港元。

政府推銷三隧分流以嚟,成日話要令公眾明白方案嘅效用同埋點樣做到分流,所以宣傳片亦從多方面打「輿論戰」,邀請的士司機、大學教授、運輸研究學會會員等講解效用,更甚至係扮網媒做街訪問吓市民慳多咗時間會做乜等。使咁多錢做宣傳的確好過以往靠官員齋噏當秘笈,可惜捉錯用神,核心在於市民對政府信任不足,冇人敢寫包單加完價實做到分流!