政Whats噏:嫌公務員委員會少嘢傾 議員促加議程

2019年04月15日 15:56
東網電視
更多新聞短片
譚文豪認為公務員事務委員會可以善用時間安排議程,仲可以清理一下待議事項。(徐家浩攝)

立法會多年嚟被批評議事效率慢、拉布等,不過今日(15日)嘅公務員事務委員會上,就有議員不滿過去會議太早完,或者議員可以多次發言,甚至要求公務員事務局局長羅智光考慮安排三個議程,認真少見。

議員譚文豪喺會議開首就話,呢個委員會嘅絕大部分議程可以好快討論完畢,好多時未夠鐘已經完成討論,或者議員可以作3、4輪發言,所以認為可以善用時間安排三個議程,仲可以清理一下待議事項咁話,而呢個意見更喺上一個立法年度提出過添!

今日嘅會議似乎證實咗譚文豪呢個睇法,事關會議早咗20分鐘完結,仲未計中途因為同時間有三個會議進行,主席范國威要參加其他會議發言而有7分鐘休會,所以范國威最尾都同政府講,呢個委員會的確有機會處理到三個議程,只要政府交文件配合就做到,因為議程係根據政府所提交嘅文件去決定,希望公務員事務局未來考慮下喎。