政Whats噏：內訌惡鬥何俊賢　劉國勳玩攬炒

立法會議員劉國勳同何俊賢為黨友關係，平時合作無間，不過佢哋今日(15日)竟然公開對決，劉國勳仲講明要攬炒，到底為乜反目成仇呢？

其實佢哋只係出席傳媒聚會，仲分兩隊以賽車遊戲作賽啫，雖然只係打機，但設備似足真實揸車，有齊軚盤同腳踏，而且遊戲以香港作背景，兩人猶如置身龍和道鍊車一樣。

不過，佢哋兩人就只有何俊賢有車牌，結果亦由何大熱勝出，且以1分39秒勝出，比劉快近1分半，實力懸殊。早早勝出嘅何都忍唔住口，為劉做導航，議員葛珮帆仲要提水邊個腳踏先係煞車。

賽後何就話有難度，尤其係畀劉撞咗兩次阻住前進，但劉笑住話攬炒嘛。劉仲透露，自己唔習慣以司機第一身視覺去玩賽車，轉頭見佢埋首玩返手機遊戲就輕易做咗MVP，睇嚟真係玩唔慣賽車啫。