政Whats噏:區議員開會爭拗 龐愛蘭搵家規應對

2019年04月16日 21:22
東網電視
更多新聞短片
Scarlett面對區議員爭拗後,即搵《會議常規》出嚟搵應對方法。(郭詠欣攝)

不時會有議員因為立場問題喺議會內爭拗,有時候疊晒聲真係好難處理。好似2月底沙田區議會轄下嘅發展及房屋委員會上,有2位區議員為噪音問題嗌交,委員會主席龐愛蘭(Scarlett)今日(16日)講番件事,坦言當日真係好嘈,覺得大家都係成年人,應該要冷靜吓,後來佢仲搵到「家規」,下次可以趕佢哋出場應付咁話。

回帶當日委員會會議,議員許銳宇話有組織成日搞歌舞表演活動嘈到街坊,要求房屋署正視問題,議員黃宇翰就話已有法例規管唔使再討論,兩人講講吓變咗鬧交。Scarlett話,當日喺兩人嘈交期間,曾經向助理民政專員查詢,到底有冇規定可以趕議員出去?當時專員擰頭歎冇,話得立法會先有。

Scarlett隨即宣布休會5分鐘,期間攞起份《會議常規》刨書,結果畀佢搵到可以趕議員出去嘅依據,笑言自己差啲成為首位趕人走嘅區議會委員會主席,好在當時休完會返嚟,2位當事人已冇事喇!如果當時Scarlett趕議員出場,會唔會畀佢哋入返去?佢就話會,因為趕出去都只係想佢哋平心靜氣諗吓先,啖氣過咗咪得囉!