政Whats噏︰工務會議被拖死　盧偉國被諷應做官

立法會不時都會於同一時間有多個會議進行，議員每逢呢啲日子就要穿梭立法會大樓內多個會議室開會，今日(17日)呢一幕又上演。話說朝早立法會工務小組委員會開會，原本要傾政府計劃於古洞南設立農業園(第一期)工程，有關工程涉款一億七千多萬元。不過，由於立法會另一會議室同時召開會議，搞到工務小組冇人開會，主席盧偉國一度暫停會議添；但盧主持會議嘅手法再次被小組委員質疑，有民主派議員仲寸佢「幾時做埋官？」

話說工務小組委員會開會時，就同隔離會議室嘅另一個法案委員會撞到應一應。由於該法案委員會首次開會，需選出正、副主席，所以工務小組會議甫開始，盧偉國已宣布暫停會議，直至隔離會議室嘅法案委員會選出主席，工務小組才復會。當時唔少民主派議員都反對，其中議員郭家麒就話，唔知道另一個會議需要花幾耐時間才選出主席，認為盧嘅決定係虛耗公帑、同極唔尊重官員，盧應該同該法案委員會作出提示同協調。盧就反駁立法會有多個會議室，同一時間有兩、三個會議進行係司空見慣嘅事，如果因為工務小組要開會，就反對其他會議召開，做法唔恰當。

郭家麒聽完盧的解釋後都未收口，仲問官員呢個安排係咪令佢哋嘅工作不受尊重。盧聽罷隨即表明官員係唔需要回應郭嘅問題，要求郭就議程進行提問。不過盧嘅說話就引起一眾民主派議員不滿。郭仲話︰「盧偉國主席我唔係問你，你幾時做埋官？你不如去做公務員啦！」同屬民主派嘅議員區諾軒亦加把口，大喊︰「佢(盧偉國)次次都做官啦！」其後郭再點名要求在席嘅發展局常任秘書長(工務)林世雄回應其問題。林就答每逢星期三都預咗嚟立法會工務小組委員會開會，一切都係跟主席安排。

結果工務小組會議開波擾攘咗十五分鐘，先至真係暫停到，由於隔壁的法案委員會因民主派拉布未能選出主席，盧就喺工務小組原定嘅會議結束時間前十五分鐘宣布復會，點知民主派議員就拉布。議員范國威質疑盧更改決定，要求佢講清楚，議員鄭松泰亦提出規程問題。結果有關農業園項目最終就無法表決，要留待下次會議再討論喇。