政Whats噏:保良局就職典禮 曾國衞撐場支持

2019年04月17日 18:04
東網電視
更多新聞短片
曾國衞話不時都同入境處同事一齊參加慈善活動。(梁家寳攝)

工作以外嘅聯誼活動可以增進同事之間嘅感情,入境處處長曾國衞昨日(16日)出席活動時話,佢同入境處嘅同事有時都會一齊參加慈善機構舉辦嘅活動,例如慈善步行、慈善跑步賽。曾國衞一向好fit,有冇後生同事會喺跑步活動贏佢呢?佢就笑笑口話,梗係後生贏啦,始終係後生體力好啲。不過佢就坦言,其實好少會比賽嘅,通常都係志在一齊參與做善事,同埋可以聯誼吓咁話。

當日活動係保良局董事會交代就職典禮,去撐場嘅有曾國衞之外,當然仲有董事會成員,包括新加入成為總理嘅「九巴金公主」伍穎梅(Winnie),佢仲孖住另一總理何許頴嘉(Candy)傾偈。Winnie話,加入保良局係因為有學校、老人院等,覺得服務夠晒廣泛。而保良局來年計劃開設「保良局專業教育書院」,為幼稚園教師或有志從事幼教工作嘅人士提供課程。講起讀書,Candy就自爆喺加拿大讀書時都曳過,曾經因為逃學而要見家長,當時喺美國嘅爸爸仲要特登飛去加拿大,好彩爸爸媽媽覺得事情已經發生咗,都冇特別怪佢,只係同佢傾吓,不過之後就幫佢轉咗去間管教得嚴啲嘅學校喇。

主席馬清楠新上任,佢太太同三個仔女都齊齊到場支持,相當溫馨。雖然落大雨,但佢致詞時就大讚「天公造美、天降甘霖」,事關水為財,希望善款都可以滾滾而來喎。佢又話,好多人都以為保良局財雄勢大,其實保良局只有兩幢收租物業,而且服務又多,涵蓋人生每個階段,由於希望服務收費平啲,所以善款對佢哋嚟講真係好重要咁話。