政Whats噏：唔夠人開會　譴責許智峯調委會流會

立法會大會昨日(17日)開會，先至因為唔夠開會法定人數而搞到流會，點知唔夠24小時，立法會今日(18日)又再流會！立法會就譴責民主黨立法會議員許智峯(峯鴿)嘅議案成立嘅調查委員會今日開會，原本需要至少5名議員出席，點知開會時間過咗法定嘅15分鐘時限，都仲欠1名議員先夠人，而飲食界議員張宇人（Tommy）就係今次流會嘅「關鍵一席」喇。

峯鴿於去年4月立法會《廣深港高鐵（一地兩檢）條例草案》委員會開會期間，涉喺會議室外搶走1名保安局女行政主任嘅手機，仲帶埋該手機進入男廁，逗留長達10多分鐘，事件最後報警處理。身兼行政會議成員嘅立法會議員葉劉淑儀提出譴責峯鴿動議，立法會於是成立調查委員會調查事件。

調查委員會原訂今日朝早8時半開會。由於該會有7名成員，根據規定，連同主席需要有5名成員出席先夠法定人數開會。據了解，該會嘅主席麥美娟（Alice）、副主席謝偉俊、會計界議員梁繼昌，以及建築、測量、都市規劃及園境界議員謝偉銓一早已攞齊文件去開會，但都仍欠1人。

因為法律界議員郭榮鏗同另一議員張國鈞唔喺香港，佢哋兩人早已請咗假，Tommy就成為開唔開到會嘅「關鍵一席」喇。可惜嘅係，幾位已出席嘅議員等極都等唔到Tommy現身，Alice唯有宣布流會。

Alice回應時確認調查委員會唔夠人開會而流會，不過今日會議只係處理吓行政事宜，所以相信對調查委員會工作冇乜影響。佢會同其他委員再夾時間開會，但估計都要到月底或下月初先至可以再開會喇。至於調查委員會可否喺立法會暑假休會前完成工作，佢就話要視乎下一步工作係點，包括幾時展開研訊、要開幾多次研訊、以及點樣做研訊等，待制訂細節後再公布。

咁究竟Tommy呢個「關鍵一席」點解冇到呢？Tommy就話佢有趕返立法會，但因為交通情況，所以遲咗3分鐘，佢亦已就此向大家致歉。

出席立法會嘅會議係議員主要職責，因為交通擠塞而返唔切立法會，最終令到會議流會，又係唔係市民可以接受嘅理由呢？