政Whats噏:租金高昂 西九戲曲中心拍烏蠅

2019年04月20日 15:19
東網電視
更多新聞短片
議員直指西九管理局必須調整營運政策,當中以減租最實際。(設計圖片)

西九文化區戲曲中心喺今年1月開幕,開幕前已經有業界批評租金昂貴,難以負擔,今日(20日)開幕三個月,成績果然未如理想,大劇院使用率只有31%,4月更加一場演出都冇,拍晒烏蠅!結果惹來唔少業界重提劇院租金昂貴問題,有議員更直指西九管理局必須調整營運政策,當中以減租最實際,如果唔係就等同嘥咗27億元興建戲曲中心。

根據統計,戲曲中心大劇院喺今年1月、2月、3月,分別演出了十場、十二場、六場戲,使用率僅31%,嚟到4月更加係「全面休息」,5月先再有節目。相比之下,另一個粵劇演出場地高山劇場就幾乎日日都有節目,4月只得一日冇任何演出,旁邊嘅演藝廳亦只有4日留空。

戲曲中心租金昂貴可謂使用率低的主因,事實上,高山劇場日租只需幾千元,但戲曲中心就要大約7萬元,當中包括場租2.2萬元,同埋8%嘅票房收益抽佣等,兩者價錢相差近十倍。

翻查資料顯示,劇曲中心開幕前已醜聞不斷,唔單止最初冇邀請粵劇界大工會八和會館統籌同參與開幕儀式,牽起一場風波,甚至當時已被批評租金昂貴,細劇團難以負擔,可惜民政事務局局長劉江華早前解釋,話戲曲中心定位清晰,係殿堂級場地,叫未夠班嘅新秀或劇團去其他平租嘅場地表演,暗示無意減租,結果咪搞到拍晒烏蠅囉!

西九管理局回覆傳媒查詢時解釋,大劇院因為4月有工程,所以不接受租用,預計5月至出年3月使用率可達75%,仲話場地使用率唔係只計演出日子,仲包括劇團綵排、入台、離台等,甚至連內部提升工程都會計埋,咁計法唔怪得使用率可以突然躍升成倍喇,咁不如安排觀眾睇埋劇團綵排、入台、離台啦,又或者搵西九文化區管理局行政總裁栢志高去做鬼佬大戲戥場充數囉!

立法會民政事務委員會副主席區諾軒批評,戲曲中心開幕前,業界已經不斷批評租金貴,當中不乏粵劇界名伶、大劇團,加上限制多多,例如西九管理局會就表演錄影,繼而擁有相關版權,而場地亦唔係特別便利,種種原因加埋造成使用率低。至於點樣改善,區就話一定要調整營運策略,當中減租最實際,否則等同浪費咗27億元去興建戲曲中心喇!